http://kbgi.moy.su/news/roditelskoe_sobranie_posvjashhenie_v_gimnazisty/2015-12-05-196
РОДИТЕЛЬСКОЕ СОБРАНИЕ - ПОСВЯЩЕНИЕ В ГИМНАЗИСТЫ!
Гимназиям – белем усағы,
Йәйеп тора гелән ҡосағын.
Йыл һайын Красноусол башҡорт гимназия-инетрантында яңынан-яңы уҡыусылар килеп тора.Быйыл да гимназия үҙ сафына 108 уҡыусы ҡабул итте. Был сараға арналған тантаналы линейка 5 декабрь район мәҙәниәт һарайында уҙғарылды. Линейканың беренсе өлөшөндә ата-әсәләр конференцияһы булды. Уны тәрбиәселәр Рәхимов Рим Әнүәр улы менән Ишкина Альбина Рәжәп ҡыҙы бик йәнле итеп алып барҙылар. Был сара “Өмөтлө ҡәләм” республика ижад конкурсы һөҙөмтәләрен иғлан итеү менән башланып китте.
Бының өсөн һүҙ башҡорт теле һәм әҙәбиәте уҡытыусыһы Рәхимова Миләүшә Миңнулла ҡыҙына бирелде. Ә “Өмөтлө ҡәләм” бәйгеһенең 2014 йылғы еңеүсеһе Ҡотова Азалия үҙе яҙған “Әсәйем” шиғыры менән тамашасыларҙың күңелен яулап алды. “Башҡорттарым, уҡыу кәрәк, уҡыу кәрәк!”. Ошо девиз аҫтында балаларында китапҡа , әҙәбиәткә һөйөү тәрбиәләгән Латыпова Алһыу Ғәзимйән ҡыҙы “Балалар тәрбиәләүҙә әҙәбиәттең әһәмиәте” исемле эҙләнеү эше аша үҙенең тәрбиә алымдары менән
уртаҡлашты. Шул уҡ темаға гимназиябыҙҙың 11б класы уҡыусыһы Юлыҡова Гөлназ бик ҡыҙыҡлы факттар менән сығыш яһап, әҙәбиәттең кеше тормошонда ҙур роль уйнағанын һөйләп бирҙе.
Быйыл илебеҙ Бөйөк еңеүҙең 70 йыллығын байрам итте. Беҙҙең гимназистар ошо датаға арналған бөтә район сараларында ла әүҙем ҡатнаштылар, шул иҫәптән “Быуындар аша еңеүгә” республика эстафетаһында ла. Уның һөҙөмтәләре менән тәрбиәсе Ғәлләмова Айгөл Фәрит ҡыҙы таныштырҙы.
Традиция буйынса гимназиябыҙ уҡыусылары йыл һайын Мәскәү ҡалаһында уҙғарылған “Киләсәк интеллекты” бөтә Рәсәй конкурсында ҡатнашып, гимназия исемен аҡлап, бик яҡшы һөҙөмтәләргә ирешеп ҡайттылар. Был бәйгелә ҡатнашыусы Үлмәҫбаев Илнур һәм Данилова Элина сығыш яһап, үҙҙәренең тәьҫораттары менән уртаҡлаштылар. Афарин, гимназистар!
Сараның икенсе өлөшө уҡыусылар өсөн бик тулҡынландырғыс булды, сөнки гимназия президенты Азат Мөхәмәтшин тарафынан тантаналы рәүештә яңы гимназистарҙан ант ҡабул ителде . Шулай уҡ был өлөштә ҡайһы бер уҡыусыларға магистр исеме бирелде. Был исем бөтә ерҙә алдынғы, яҡшы уҡыған, тәртипле, төрлө мәктәп, район сараларында әүҙем ҡатнашҡан , башҡалар өсөн өлгө булған уҡыусыларға ғына бирелә.Бына улар: спорт магистры – Мәүлетҡолов Ильнур, сәнғәт магистры – Сираев Марсель, фән магистры – Хәсәнов Айҙар. Зәйнетдинова Ильмираға “Өлгөлө гимназист” исеме бирелде, ә беҙҙең махсус ҡунағыбыҙ “Мәжит Ғафури” фондының етәксеһе Камаева Люция Мөхәмәтзакир ҡыҙы “Почетлы гимназист” исеменә лайыҡ булды. Барлыҡ сығыштар ҙа “Башҡортостан ынйылары” фольклор бәйгеһенең 2015 йылғы Гран-при эйәләре, 10б класы уҡыусылары ҡуйған “Тау битләүендә” постановкаһы, “Әкиәттә ҡунаҡта” мәктәп бәйгеһе еңеүселәре – 3а класы уҡыусыларының “Төлкө ниңә хәйләкәр булған?” әкиәте менән, республика фольклор бәйгеһенең беренсе дәрәжә лауреаты “Рух” фольклор төркөмө сығыштары менән аралаштырып алып барылды. Б ай һәм матур тантаналы сара барлыҡ ата-әсәләр күңеленә лә хуш килгәндер тип уйлайбыҙ.
Ҡотова Азалия, Сәйғәфәрова Алия,Красноусол башҡорт-гимназия интернаты уҡыусылары
