Красноусол ҡасабаһы һәм Еҙем-Ҡаран ауылы халҡы ла бөгөн яҡташтарының иҫтәлегенә күркәм байрам ойошторҙо.

Бөйөк шағирҙың иҫтәлегенә арналған байрам район үҙәге  Красноусол ҡасабаһында һәйкәлгә сәскә һалыуҙан башланды. Сараға республиканың билдәле әҙиптәре, журналистар йыйылды. Мәҙәниәт усағы алдында ойошторолған сәскәләр күргәҙмәһе бер кемде лә битараф ҡалдырманы. Белем усаҡтары вәкилдәре йәйге биҙәктәр аша Мәжит Ғафуриҙың тормош юлын, ижади мираҫын күрһәтә. 
Юбилей концерты «Торналар» бейеүе менән башланды. Был юҡтан түгел. Артабан сәхнәгә бәләкәй Мәжит ролен башҡарыусы малай сыҡты. Яңғыҙ ҡалған ҡош уға ҡаурый бүләк итте. Ижадҡа һөйөү уятты. 
Был йырҙы тамашасылар баҫып тыңланы. Мәжит Ғафуриҙың «Үҙем һәм халҡым» шиғыры әле лә кешелекте алға әйҙәүсе гимн булып яңғырай. Байрам концертынан һуң ҡуныҡтар Еҙем-Ҡаран ауылына юлланды. Халыҡ шағиры исемен йөрөткән музей экспонаттары ла барыһын да ла ҙур ҡыҙыҡһыныу уятты. Музей етәксееге белдереүенсә, был йорттан халыҡ бер ҙә өҙөлмәй. 
Төп тамаша Ғафури исемен йөрөткән паркта ойошторолдо. Унда шиғриәт һөйөүселәрҙе шағир ижад иткән геройҙар ҡаршыланы. Ҡәләм оҫтаһының бала сағы ла тап ошо ерҙә үткән, яҡында ғына уның тыуған йорто булған. Хәҙер был урын үҫеп килгән быуынға рух өҫтәүсе биләмә һанала. 
Ҡаран шишмәһе сылтыр-сылтыр аҡҡан кеүек ваҡытты ла туҡтатып булмай. Ләкин йылдар уҙған һайын шағирҙың бөйөклөгө, уның әҙәби мираҫына иғтибар арта ғына. Тыуған илен, ерен данлаусы әҙип халыҡ күңелен мәңгелеккә арбаған.
Гөлназ Хәйбуллина

http://tv-rb.ru/bash/novosti/m-ni-t/bash-ortostandy-khaly-sha-iry-m-zhit-afuri-y-tyuyuyna-135-yyl-tulyu-ay-anly-respublika-t-b-kt-rend-yu/?sphrase_id=130779

Денис Мансуров Өфөгә Саҡмағош районынан ҡанатланып килеп еткән. Бөйөк шағирҙың тыуған көнөнә арналған шиғри марафонда ҡатнашыуҙы ул ҙур мәртәбәгә тиңләй. Байрамда ҡатнашыусылар Мәжит Ғафури ижадынан яратҡан шиғырҙарын һөйләне. 
Рәсәйҙең һәм Башҡортостандың халыҡ артисы Таңсулпан Бабичева бөйөк шағир исемен йөрөткән театрға 30 йылға яҡын ғүмерен арнай.  Талантлы актриса бала саҡтан уҡ  Мәжит Ғафуриҙың әҫәрҙәрен яратып уҡый. 
Шағирҙың йорт-музейының тарнихы ла ҡыҙыҡлы. Был йортто уға халыҡ шағиры исеме бирелгәс бүләк итәләр. Ошонда ул  «Ҡара йөҙҙәр», «Тормош баҫҡыстары» һәм башҡа  әҫәрҙәрен ижад итә. 
Мәжит Ғафуриҙың исемен мәңгелләштереү, әҫәрҙәрен халыҡ күңелендә ҡалдырыу буйынса республикала әүҙем эш алып барыла. Уның шиғриәте төрлө телдәргә тәржемә ителә, әҙәби конкурстар даими ойошторолоп тора. Ауыл-ҡалаларҙа ла шәхес исемен йөрөткән урамдар күп. 
Яңыраҡ баш ҡалала ҡуйылған һәйкәлде генә алайыҡ. Унда ла Мәжит Ғафуриҙың «Үҙем һәм халҡым» шиғырынан өҙөк килтерелә. Әҙәбиәт йылында был, әлбиттә, шиғриәт һөйөүселәр өсөн ҙур бүләк.
Гөлназ Хәйбуллина